कोण आहे 'रचेल कौर' जी रोज ऑफिसला पोहोचण्यासाठी करतेय विमानाने प्रवास, कारण ऐकून व्हाल थक्क!
नवी दिल्ली: सहसा लोक आपल्या घरापासून ऑफिसला जाण्यासाठी त्यांच्या वैयक्तिक वाहनाचा वापर करतात आणि नाहीतर सार्वजनिक वाहतुकीने ये-जा करतात. पण जर कोणी रोज विमानाने ऑफिसला ये-जा करत असेल तर काय होईल? आपले घर आणि ऑफिस एकत्र व्यवस्थापित करणाऱ्या या महिलेची कहाणी ऐकून लोक थक्क होत आहेत. मलेशियात राहणारी रचेल कौर ही भारतीय वंशाची आहे आणि ती रोज 600 किलोमीटर विमानाने प्रवास करून सकाळी ऑफिसला जाते आणि रात्री घरी परतते.
रचेल कौरने सांगितले की ती हे फक्त तिच्या दोन मुलांसाठी करते. तिने सांगितले की, असे केल्याने तिला तिच्या मुलांसोबत वेळ घालवता येतो आणि त्यांच्या अभ्यासात मदत करण्यासाठी वेळ मिळतो. आता हा प्रश्न नक्कीच मनात येत असेल की, असे केल्याने बरेच पैसे खर्च होतील? पण तसे नाही. रचेल विमानाने प्रवास करते आणि पैसेही वाचवते.
रोज सकाळी 4 वाजता सुरू होते रचेलची धडपड
एका यूट्यूब चॅनेलने या महिलेची दिनचर्या कव्हर केली आणि मग कळले की ही महिला रोज सकाळी 4 वाजता उठते आणि मलेशियातील पेनांग शहरापासून कुआलालंपूरला जाण्यासाठी धडपड सुरू करते. कुआलालंपूरमध्ये राहण्यापेक्षा रोज विमानाने प्रवास करणे स्वस्त असल्याचे रचेलने सांगितले. रचेल कौरने सांगितले की, ती सकाळी 5 वाजता आपल्या घरातून विमानतळाकडे निघते. सकाळी 5.55 वाजता तिच्या फ्लाइटचे बोर्डिंग होते. विमानाने तिच्या ऑफिसपर्यंतचा प्रवास साधारणतः अर्धा तास किंवा 40 मिनिटांचा असतो आणि ती सकाळी 7.45 पर्यंत ऑफिसला पोहोचते.
विमानाने प्रवास करूनही पैसे कसे वाचतात?
रचेलने सांगितले की, सुरुवातीला तिने कुआलालंपूरमध्ये कुटुंबापासून दूर राहण्याचा निर्णय घेतला होता. ती फक्त शनिवार आणि रविवार या आठवड्याच्या शेवटी कुटुंबासोबत वेळ घालवू शकत होती. कुआलालंपूरमध्ये राहणे खूप महागडे होते. ती भाड्याने राहत होती आणि सरासरी 474 यूएस डॉलर्सचा खर्च दरमहा येत होता.
रचेलने सांगितले की, ती रोज विमानाने ये-जा करते, त्यासाठी तिचे फक्त 316 यूएस डॉलर्स खर्च होतात. विमानतळावरून ऑफिसपर्यंत पोहोचण्यासाठी तिला फक्त 5 ते 7 मिनिटे लागतात, असे तिने सांगितले. ती एअर एशिया एअरलाइन्समध्ये काम करते. जरी ती रोजच्या विमानासाठी स्वतःचे पैसे खर्च करते, परंतु एअरलाइन्समध्ये काम केल्यामुळे तिला बरीच सूट मिळते. असे केल्याने ती रोज ऑफिसही व्यवस्थापित करते आणि परत आपल्या घरी जाऊन आपल्या मुलांना वेळ देऊ शकते, असे ती म्हणाली.
➤ वाढवा आपला व्यवसाय / वेब पोर्टल्स करिता इथे क्लिक करा.Call :- 9890 546 909.
