पैशाचं अमिष दिसलं की भल्याभल्यांची बुद्धी गहाण पडते... अधिकचे पैसे मिळवण्याची संधी असेल तर लोक नोकरीही पणाला लावतात.. काहीजणांना खरोखर पैसा मिळतही असेल पण बहुतांश ठिकाणी तसं होत नाही. या पद्धतीचे उपद्याप अंगलटच येण्याची शक्यता जास्त असते. विदर्भातील भंडारा जिल्ह्यातल्या तुमसरमध्येही हाच प्रकार घडला आहे. येथील अॅक्सिस बँकेच्या मॅनेजरने असा काही उपद्याप केला की बँकेतून त्याची रवानगी थेट पोलीस कोठडीत झाली.
काय आहे प्रकरण?
गौरीशंकर बावनकुळे असं या प्रकरणातल्या मुख्य आरोपी बँक मॅनेजरचं नाव ईआहे. त्यानं या बँकेतील खातेदारांची तब्बल पाच कोटी रुपये परस्पर काढले. त्यानं अगदी फिल्मी स्टाईलनं स्वतः काम करत असलेल्या बँकेवरच दरोडा टाकला. तू आम्हाला पाच कोटींची कॅश दे आम्ही दीड तासात तुला सहा कोटी देतो असं आमिष या मॅनेजरला एका एजन्सीने दाखवलं होतं. त्यानंतर बावनकुळेनं बँकेतल्या खातेधारकांच्या खात्यातून ही रक्कम जमा केली. त्यानं बँकेतल्या आणखी एका साथीदाराच्या मदतीने हे पैसे गोळा केले. पण इतके पैसे बँकेत ठेवता येणं तर शक्यच नव्हतं.
त्यांनी बँकेच्या बाजूची एक ड्रायक्लिनिंगचं दुकान गाठलं. त्या दुकानदाराला हे पैसे त्याच्या दुकानात ठेवण्यासाठी एक लाख रुपये द्यायचं कबुल केले. दुकानदाराने आणि मॅनेजरने हा पैसा दुकानात नेऊन ठेवला. पण पोलीसांना खबर लागली आणि आर्थिक गुन्हे शाखेने धाड टाकली. अचानक इतकी मोठी कॅश शहरात सापडल्याने, अनेकांना हे हवाला रॅकेट असल्याची शक्यता वाटली.
पण पोलीसांनी माहिती दिल्यावर हा आपलाच पैसा होता हे लोकांच्या लक्षात आले. दीड तासात पाच कोटीचे सहा कोटी करून देतो यावर बँकेच्या मॅनेजरचा विश्वास बसावाआणि त्याने बँकेतून एवढी मोठी रक्कम रोखीने बाहेर काढावी, हे सहज पटण्यासारखं नाही. त्यामुळे गौरीशंकर बावनकुळे सांगतोय ते खरं आहे की या प्रकरणात वेगळाच काही अँगल आहे याचातपास भंडारा पोलीसांना करावा लागणार आहे.
➤ वाढवा आपला व्यवसाय / वेब पोर्टल्स करिता इथे क्लिक करा.Call :- 9890 546 909.
