चोराला महिलांचा शौक, अभिनेत्रीला दिलं 3 कोटींचं घर, सोलापूरच्या स्वामीला अटक
सोलापूर : गेल्या वीस वर्षांत देशभरात अनेक ठिकाणी चोरी केलेल्या अट्टल चोराला पकडण्यात पोलिसांना यश आलं आहे. बेंगळुरू पोलिसांनी ही कारवाई केली आहे. महत्त्वाचं म्हणजे हा आरोपी महाराष्ट्रातल्या सोलापूर जिल्ह्यातला आहे.
बेंगळुरू पोलिसांनी केलेल्या कारवाईत मूळचा महाराष्ट्रातल्या सोलापूर जिल्ह्यातल्या असलेल्या 37 वर्षांच्या चोराला पकडण्यात यश आलं. पंचाक्षरी एस. स्वामी असं या चोराचं नाव आहे. त्याला 4 फेब्रुवारी 2025 रोजी अटक करण्यात आली. त्याला पकडण्यात आल्याच्या वृत्ताला पोलीस आयुक्त बी. दयानंदा यांनी दुजोरा दिला.
पोलिसांनी दिलेल्या माहितीनुसार, या आरोपीने 2003 सालापासून चोरीचे प्रकार सुरू केले. त्या वेळी तो अल्पवयीन होता. 2009 सालापर्यंत त्याने चोरीच्या माध्यमातून कोट्यवधी रुपयांची संपत्ती गोळा केली. 2014-15 साली तो एका अभिनेत्रीसह रिलेशनशिपमध्ये होता. तिच्यावर त्याने खूप पैसे खर्च केले. त्याने आपल्या या प्रेयसीसाठी 22 लाख रुपयांचं अॅक्वेरियम खरेदी केली. एवढंच नव्हे, तर कोलकात्यात तिच्यासाठी तीन कोटी रुपयांचं घर खरेदी केलं.
गुजरात पोलिसांनी 2016 साली या आरोपीला अटक केली होती. तरीही तो सुधारला नाही. तुरुंगातून सुटका झाल्यानंतर तो पुन्हा चोरी करू लागला. 2024 साली तो बेंगळुरूत आला. तिथेही त्याने चोरीचे हे उद्योग सुरूच ठेवले. या चोराचं वैशिष्ट्य असं, की तो खासकरून रिकाम्या घरांवर लक्ष ठेवून असायचा आणि शक्यतो अशा घरांमध्येच चोरी करायचा. तसंच, चोरी केल्यानंतर लगेचच तो आपले कपडे बदलायचा. शिवाय तो एकटाच चोरी करायचा. त्यामुळे त्याला पकडणं, त्याचा माग काढणं या गोष्टी थोड्या कठीण व्हायच्या.9 जानेवारी 2025 रोजी बेंगळुरूतल्या मारुतीनगरमधल्या एका घरातून या चोराने 14 लाख रुपये मूल्याचे सोनं आणि चांदीचे दागिने चोरल्याचा आरोप ठेवून त्याला बेंगळुरू पोलिसांनी अटक केली आहे. या घटनेनंतर सीसीटीव्ही फुटेज तपासत असताना त्या आरोपीची ओळख पटली. त्यानंतर पोलिसांनी कारवाई करून त्याला अटक केली. या चोराच्या ताब्यातून पोलिसांनी 33 ग्रॅम सोन्याचे दागिने, 181 ग्रॅम वजनाचं सोन्याचं बिस्किट आणि एक हत्यार जप्त केलं आहे.
➤ वाढवा आपला व्यवसाय / वेब पोर्टल्स करिता इथे क्लिक करा.Call :- 9890 546 909.
