हप्ता वसुलीच्या आरोपाने महायुतीत ठिणगी! शिंदेंच्या शिलेदाराला भाजप आमदाराने दिला सल्ला...
पुणे : उपमुख्यमंत्री एकनाथ शिंदे यांच्या नेतृत्वातील शिवसेनेचे खासदार श्रीरंग बारणे यांच्या लेटर बॉम्बचे पडसाद उमटण्यास सुरुवात झाली आहे. खासदार बारणे यांना भाजप आमदाराने प्रत्युत्तर दिले आहे.
मुख्यमंत्री देवेंद्र फडणवीस यांच्या अखत्यारीत असलेल्या गृह खात्यावर आरोप झाल्याने चर्चांना उधाण आले आहे. एकनाथ शिंदे यांना बंडात साथ देणारे मावळचे खासदार श्रीरंग बारणे यांनी थेट राज्याच्या गृह विभागावर निशाणा साधला आहे. पिंपरी चिंचवड पोलीस हप्ते वसुली करत असल्याचा गंभीर आरोप खासदार बारणे यांनी केल्याने खळबळ उडाली आहे. खासदार श्रीरंग बारणे यांनी राज्याच्या गृह विभागाला लक्ष्य केल्याने चर्चांना उधाण आले होते.
भाजप आमदाराने दिले प्रत्युत्तर...
खासदार बारणे यांच्या लेटर बॉम्बमुळे सत्ताधारी भाजप-शिवसेनेमध्ये वाद होण्याची चिन्हे निर्माण झाली. तर, दुसरीकडे भाजपचे प्रवक्ते आणि विधान परिषद आमदार अमित गोरखे यांनी वादात उडी घेत खासदार बारणे यांना प्रत्युत्तर दिले आहे. खासदार बारणे यांनी काळजी करू नये असं म्हणत त्यांना सबुरीचा सल्ला दिला. राज्याचे मुख्यमंत्री देवेंद्र फडणवीस यांच्या नेतृत्वात असलेल्या गृहविभागात असे गैर प्रकार होणार नाही असं म्हणत आमदार गोरखे यांनी खासदार बारणे यांचा आरोप खोडून काढण्याचा प्रयत्न केला.
खासदार बारणे यांनी पत्रात काय म्हटले?
राज्याचे मुख्यमंत्री देवेंद्र फडणवीस यांच्याकडे सध्या गृह खातं आहे, असं असून देखील पिंपरी चिंचवड पोलीस नागरिकांना दाद देत नाहीत, तक्रारी दाखल करून घेत नाहीत आणि हफ्ते वसुली करून वरिष्ठांना देतात असं लेखी पत्र देत खासदार बारणे यांनी पिंपरी चिंचवड पोलीस आणि राज्याच्या गृहविभागाच्या कारभारावर बोट ठेवलं. बारणे हे एकनाथ शिंदे यांचे निकटवर्तीय आहेत. त्यांनी केलेल्या या आरोपामुळे भाजप आणि शिवसेनेतील खदखद चव्हाट्यावर येण्याची शक्यता आहे.
➤ वाढवा आपला व्यवसाय / वेब पोर्टल्स करिता इथे क्लिक करा.Call :- 9890 546 909.
