सांगली जिल्ह्यात महायुतीला कल; कोणात्या पक्षाच्या किती जागा आल्या पहा...
सांगली : लोकसभा निवडणुकीमध्ये भाजपला नाकारलेल्या सांगली जिल्ह्यात विधानसभा निवडणुकीत मात्र मतदारांनी महायुतीला कल दिला आहे. जिल्ह्यात शिराळा, मिरज, सांगली, आणि जत या जागांवर भाजपने विजय मिळवला, तर राष्ट्रवादी शरदचंद्र पवार पक्षाला दोन जागा व काँग्रेस व शिवसेना शिंदे गटाला प्रत्येकी एक जागा मिळाली आहे.
सुरुवातीला एकाकी वाटणाऱ्या शिराळा विधानसभा मतदारसंघात भाजपचे सत्यजित देशमुख यांनी विजय मिळवला, राष्ट्रवादी शरदचंद्र पवार पक्षाचे मानसिंगराव नाईक यांचा या ठिकाणी पराजय झाला आहे. मानसिंगराव नाईक हे जयंत पाटील यांचे निकटवर्ती समजले जातात, त्यामुळे ही जयंत पाटील यांची नामुष्की समजली जात आहे.
मिरज विधानसभा मतदारसंघांमध्ये माजी मंत्री सुरेश खाडे यांनी विजय मिळवला, याठिकाणी शिवसेने उबठाचे तानाजी सातपुते यांनी निवडणूक लढली होती, वंचित व एमआयएमने देखील निवडणूक काढली मात्र पालकमंत्री असताना केलेली विकास कामांच्या जोरावर खाडे यांनी पुन्हा एकदा विजय मिळवला, खाडे यांना सुमारे 45 हजारांची आघाडी मिळाली.
सांगली विधानसभा मतदारसंघामध्ये भाजपचे विद्यमान आमदार सुधीर गाडगीळ यांनी पुन्हा एकदा विजय मिळवत हॅट्रिक केले आहे, गाडगीळ यांच्या विरोधात काँग्रेसचे पृथ्वीराज पाटील यांनी निवडणूक लढली, त्याचबरोबर काँग्रेस मधून बंडखोरी करत जयश्री पाटील यांनी आपला अपक्ष उमेदवारी अर्ज ठेवला, याचा परिणाम मत विभागणी मध्ये झाला; व गाडगीळ यांची विजयाची वाट मोकळी झालेली या ठिकाणी पाहायला मिळाली.
इस्लामपूर वाळवा विधानसभा मतदारसंघांमध्ये राष्ट्रवादी शरदचंद्र पवार पक्षाचे प्रदेशाध्यक्ष जयंत पाटील यांना विजय मिळाला, मात्र राष्ट्रवादी अजित पवार पक्षातून निशिकांत पाटील यांनी त्यांना कडवी झुंज दिली. महायुतीतून माजी मंत्री सदाभाऊ खोत, सम्राट महाडिक, गौरव नायकवडी, आनंदराव पाटील असे सर्व घटक पक्ष एकत्र आल्याने जयंत पाटील यांचे मताधिक्य कमालीचे कमी झाले.
खानापूर आटपाडी विधानसभा मतदारसंघातून दिवंगत आमदार अनिल बाबर यांचे चिरंजीव सुहास बाबर यांनी जिल्ह्यात सर्वाधिक मतांनी विजय मिळवला, त्यांच्या विरोधात राष्ट्रवादी शरदचंद्र पवार पक्षातून वैभव पाटील यांनी निवडणूक लढली तर माजी आमदार राजेंद्र देशमुख यांनी या ठिकाणी बंडखोरी केली होती. अनिल बाबर यांची सहानुभूती आणि केलेली विकासकामे यामुळे बाबर यांचा विजय झाला.
पलूस कडेगाव विधानसभा मतदारसंघात काँग्रेसचे नेते विश्वजीत कदम हे विजयी झाले, मात्र त्यांच्या विरोधात भाजपचे संग्राम देशमुख यांनी कडवी झुंज दिली असल्याचे पाहायला मिळाले. विश्वजीत कदम २०१९ मध्ये सुमारे पावणे दोन लाख मतांनी विजयी झाले होते, मात्र यावेळी ते 1 लाख 29 हजार मतांपर्यंत खाली आले.
जतकरांचा छंद गोपीचंद
जत विधानसभा मतदारसंघांमध्ये भाजपचे गोपीचंद पडळकर यांनी विजय मिळवला. या ठिकाणी स्थानिक भूमिपुत्र विरुद्ध बाहेरील उमेदवार हा मुद्दा चर्चेचा राहिला, मात्र पडळकर यांनी प्रचाराच्या माध्यमातून हा मुद्दा खोडून काढला. या ठिकाणी काँग्रेसचे विक्रम सावंत यांनी पडळकर यांच्या विरोधात निवडणूक लढली. भाजपमध्ये झालेल्या बंडखोरीनंतरही पडळकर यांना हा विजय मिळवता आला. देवेंद्र फडणवीस यांनी सभेवेळी पडळकर यांना दिलेल्या मंत्री पदाच्या संधीचा उल्लेख देखील त्यांच्या विजयला कारणीभूत ठरला.
तासगवात रोहित दादाच
राष्ट्रवादी शरदचंद्र पवार पक्षातून तासगाव कवठेमहांकाळ विधानसभा मतदारसंघांमध्ये दिवंगत उपमुख्यमंत्री आर आर पाटील यांचे चिरंजीव रोहित पाटील यांनी विजय मिळवला, त्यांच्या विरोधात दोनवेळा खासदार राहिलेले संजयकाका पाटील यांनी राष्ट्रवादी अजित पवार गटातून निवडणूक लढली. याठिकाणी नवीन युवक विरुद्ध मुरब्बी राजकारणी अशी लढत झाली, ज्यामध्ये रोहित पाटील यांनी सुमारे 28 हजार पेक्षा जास्त मतांनी विजय मिळवला.
➤ वाढवा आपला व्यवसाय / वेब पोर्टल्स करिता इथे क्लिक करा.Call :- 9890 546 909.
