धक्कादायक! लोकलमधून पडून महिलेचा मृत्यू; अंबरनाथ-बदलापूर स्थानकामधील घटना
अंबरनाथ : अंबरनाथमध्ये लोकलमधून पडून महिलेचा मृत्यू झाल्याची घटना घडली आहे. अंबरनाथ आणि बदलापूर रेल्वे स्थानकांदरम्यान मंगळवारी रात्री साडेआठच्या दरम्यान ही घटना घडली. ऋतुजा गणेश जंगम असे या महिलेचे नाव असून ती कर्जतला राहणारी असल्याची प्राथमिक माहिती पोलिसांनी दिली आहे.
ऋतुजा ही ठाण्याला एका खासगी ट्रॅव्हल कंपनीत कामाला होती. आज ठाण्याहून कर्जत ट्रेनने परतताना अंबरनाथ रेल्वे स्थानकात गर्दीच्या रेट्यामुळे ती खाली उतरून पुन्हा ट्रेनमध्ये चढली, पण यावेळी तिला गर्दीमुळे आत जाताच आलं नाही आणि ती दारात उभी राहिली. अंबरनाथ स्थानकातून ट्रेन सुटताच अवघ्या काही अंतरावर गर्दीमुळे तिचा हात सुटून ती खाली पडली. या अपघाताची माहिती मिळताच रेल्वे पोलिसांनी घटनास्थळी धाव घेत तिला उल्हासनगरच्या शासकीय मध्यवर्ती रुग्णालयात आणलं. मात्र डॉक्टरांनी तिला तपासून मृत घोषित केले. याप्रकरणी रेल्वे पोलीस अधिक तपास करत आहेत.
➤ वाढवा आपला व्यवसाय / वेब पोर्टल्स करिता इथे क्लिक करा.Call :- 9890 546 909.
