टेलिग्राम अॅपचा वापर सध्या प्रचंड वाढला आहे. व्हॉट्सअॅपचा पर्याय म्हणून अनेकजण टेलिग्रामचा वापर करत आहेत. मात्र, या लोकप्रिय अॅपवरही घोटाळेबाज सक्रिय झाले आहेत. ग्राहकांना फसवण्याचे नवनवे फंडे वापरत हे घोटाळेबाज आपले जाळे पसरवत आहेत. याच पार्श्वभूमीवर दूरसंचार विभागाने (DOT) टेलिग्रामवर सुरू असलेल्या विविध फसवणूक प्रकारांविषयी नागरिकांना सतर्कतेचा इशारा दिला आहे.
फसवणुकीचे प्रकार कोणते?
दूरसंचार विभागाने जारी केलेल्या अॅडव्हायजरीत असे नमूद केले आहे की, टेलिग्रामवर अनेक खोट्या चॅनेल्स आणि लिंकद्वारे लोकांना फसवण्याचे प्रकार सुरू आहेत. अनेक घोटाळेबाज स्वतःला नामांकित कंपन्यांचे प्रतिनिधी असल्याचे भासवून काम करत आहेत. खासकरून वर्क फ्रॉम होम स्कीम, लॉटरी जिंकल्याचे संदेश, आणि फेक वेबसाइट लिंकद्वारे लोकांना पैसे उकळण्याचा प्रकार मोठ्या प्रमाणावर सुरू आहे. याशिवाय, बनावट गिफ्ट कार्ड्स खरेदी करण्यास भाग पाडणाऱ्या लिंक पाठवल्या जात आहेत. हे घोटाळे ओळखणे अनेक वेळा कठीण होत असल्याने ग्राहकांनी अशा कोणत्याही संशयास्पद लिंकवर क्लिक न करण्याचे आवाहन करण्यात आले आहे.
स्पॅम कॉल्स रोखण्यासाठी TRAI ची कठोर भूमिका
दूरसंचार विभागासोबतच भारतीय दूरसंचार नियामक प्राधिकरण (TRAI) देखील स्पॅम कॉल्सच्या समस्येवर काम करत आहे. ट्रायने अलीकडेच भारती एअरटेल, जिओ, बीएसएनएल, आणि व्होडाफोन आयडिया यांसारख्या प्रमुख टेलिकॉम कंपन्यांवर तब्बल 12 कोटींचा दंड ठोठावला आहे.
या कंपन्या स्पॅम कॉल्स कमी करण्यासाठी आखलेल्या नियमांचे पालन करण्यात अपयशी ठरल्याने त्यांना वारंवार दंड भोगावा लागतो आहे. आतापर्यंत या कंपन्यांवर एकूण 141 कोटींचा दंड आकारण्यात आला आहे. मात्र, या नव्या दंडाविषयी कोणतीही अधिकृत प्रतिक्रिया या कंपन्यांनी दिलेली नाही.
सरकारची पुढील पावले काय?
जर या टेलिकॉम कंपन्यांनी दंड भरला नाही, तर दूरसंचार विभागाला त्यांच्या बँक गॅरंटीमधून ही रक्कम वसूल करण्याचे आदेश देण्यात आले आहेत. ग्राहकांना स्पॅम कॉल्स व फसवणूक टाळण्यासाठी आणखी कठोर नियम लागू करण्याचे नियोजन सरकारने केले आहे.
ग्राहकांनी काय काळजी घ्यावी?
1. अनोळखी लिंक किंवा चॅनेल्सवरून आलेल्या संदेशांवर विश्वास ठेवू नका.
2. वर्क फ्रॉम होम किंवा लॉटरीसारख्या आकर्षक ऑफरचे पडताळणी केल्याशिवाय कोणतीही माहिती शेअर करू नका.
3. तुमच्या टेलिकॉम सेवा प्रदात्याला स्पॅम कॉल्सविषयी तक्रार नोंदवा. सरकारच्या सतर्कतेच्या इशाऱ्यानंतर ग्राहकांनी सजग राहणे महत्त्वाचे आहे. फसवणूक टाळण्यासाठी ऑनलाइन व्यवहारांबाबत अधिक सतर्कता बाळगा आणि अशा फसव्या योजनांना बळी पडणे टाळा.
➤ वाढवा आपला व्यवसाय / वेब पोर्टल्स करिता इथे क्लिक करा.Call :- 9890 546 909.
