बदलापूरमध्ये दोन चिमुकल्या मुलींवर झालेल्या अत्याचारानंतर राज्यात गेल्या 2-3 दिवसात अनेक अत्याचाराच्या घटना समोर आल्या आहेत. बदलापूर, पुणे, नाशिक आणि अकोल्यानंतर नागपूरमध्ये एका आठ वर्षीय मुलीवर अत्याचार झाल्याची घटना घडली आहे. नागपूर जिल्ह्यातील कामठी शहरामध्ये एका आठ वर्षांच्या मुलीवर तिच्या शेजारी राहणाऱ्या 50 वर्षांच्या माणसाने लैंगिक अत्याचार केल्याची घटना समोर आली आहे. या घटनेमुळे शहरात खळबळ उडाली आहे.
नेमकं प्रकरण काय ?
कामठी शहरात एका 50 वर्षांच्या व्यक्तीने आठ वर्षांच्या चिमुरडीला खाण्याचे आमिष दाखवले. घरात कोणीही नसल्याचा फायदा घेत त्या मुलीवर लैंगिक अत्याचार केला. पीडित मुलीने घडलेला सगळा प्रकार आपल्या आईला सांगितला. त्यानंतर पीडितेच्या आईने पोलिसांकडे तक्रार केली. या प्रकरणातील आरोपीला पोलिसांनी अटक केली आहे.
मिळालेल्या माहितीनुसार, या प्रकरणातील आरोपीचं नाव धनीराम वासनिक असं आहे. घरी कोणीही नाही हे बघून या माणसाने शेजारी राहत असलेल्या मुलीला खाऊ देण्याचं आमिष दाखवले आणि तो तिला घरी घेऊन गेला. मुलगी एकटी असल्याची संधी साधून आदेशने चिमुकलीवर अत्याचार केला. तसेच चाकूचा धाक दाखवत या सगळ्या प्रकाराबद्दल कोणालाही काहीही न सांगायचं नाही, असं म्हटलं. सगळ्या प्रकारामुळे घाबरलेल्या मुलीने रडत रडत आईला याविषयी सांगितल्यावर तिने पोलीस स्टेशनमध्ये तक्रार नोंदवली. पोलिसांनी Pocso अंतर्गत गुन्ह्याची नोंद करत आरोपीला बेड्या ठोकल्या आहेत. आरोपी सध्या पोलीस कोठडीत आहे.
कोलकातामधील प्रशिक्षणार्थी डॉक्टरवर बलात्कार करत तिची हत्या करण्यात आली. त्यानंतर महाराष्ट्रातही लैंगिक अत्याचाराची काही प्रकरणे समोर आली. बदलापूर, पुणे, नाशिक आणि अकोल्यातील मुलींवर अत्याचारझाल्याची प्रकरणे समोर आली. पोलिसांनी या सगळ्या प्रकरणातील आरोपींना अटक केली आहे. पण वारंवार घडणाऱ्या या घटनांमुळे महिला सुरक्षेचा प्रश्न ऐरणीवर आला आहे. राज्य सरकारने अत्याचार आणि बलात्काराच्या प्रकरणाती आरोपींना कठोर शिक्षा द्यावी, अशी मागणी होत आहे. या घटनांना आळा घालण्यासाठी राज्य सरकार काय पाऊल उचलणार, हे पाहावं लागेल. कोणीही मुलींवर अत्याचार करण्याची हिंमत करु नये म्हणून खरंच काहीतरी करण्याची गरज आहे, असं राज्यातील नागरिकांचं म्हणणं आहे.
➤ वाढवा आपला व्यवसाय / वेब पोर्टल्स करिता इथे क्लिक करा.Call :- 9890 546 909.
