तब्बल २५ गुन्हे असलेल्या गुन्हेगाराचा पुणे कॅम्प परिसरात निर्घृण खून
पुणे : खूनाचा प्रयत्न, जबरी चोरी, अत्याचार, विनयभंग असे तब्बल २५ गुन्हे असलेल्या गुन्हेगाराचा कॅम्पात पहाटे टोळ्याने निर्घृण खून केल्याचा धक्कादायक प्रकार समोर आला आहे. अरबाज बबन शेख (रा. चुडामण तालीम, कॅम्प) असे खून झालेल्या गुन्हेगाराचे नाव आहे.
अरबाज शेख हा सराईत गुन्हेगार होता. त्याच्या नावावर अगदी खूनाचा प्रयत्न केल्यापासून जबरी चोरी, चोरी, मारहाण, विनयभंग असे जवळपास २५ गुन्हे दाखल होते. त्याची कॅम्प परिसरात दहशत होती. त्याला एमपीडीएअंतर्गत कारवाई करुन कारागृहात स्थानबद्ध केले होते. त्यातून तो नुकताच सुटला होता. पोलीस नियंत्रण कक्षाला पहाटे साडेतीन वाजण्याच्या सुमारास कॅम्पमधील खाऊ गल्लीत मारामारी सुरु असल्याची माहिती मिळाली.
पोलिसांनी घटनास्थळी जाऊन पाहणी केली. तेव्हा टोळके पळून गेले होते. एक तरुण निपचिप पडला होता. त्याला ससून रुग्णालयात नेले असता डॉक्टरांनी त्याचा मृत्यु झाल्याचे जाहीर केले. वरिष्ठ पोलीस निरीक्षक दशरथ पाटील व त्यांच्या सहकार्‍यांनी परिसरातील सीसीटीव्ही ताब्यात घेतले असून त्यावरुन आरोपींची ओळख पटविण्याचा प्रयत्न सुरु आहे.
➤ वाढवा आपला व्यवसाय / वेब पोर्टल्स करिता इथे क्लिक करा.Call :- 9890 546 909.
