4 कोटींच्या विम्यासाठी व्यवसायिकाने केली मित्राची हत्या
पंजाबमधील फतेगढ साहिबमध्ये एका व्यक्तीने आपल्या मृत्यूची खोटी कथा रचून ४ कोटी रुपयांचा दावा केला आहे. यासाठी त्याने आपल्याच एका मित्राची हत्या केली. या फसवणुकीत त्याच्या पत्नीशिवाय अन्य 4 जणांचाही सहभाग होता. पंजाबमधील या व्यावसायिकाने त्याच्या मृत्यूचा बनाव करण्याचा कट रचला जेणेकरून तो आपल्या व्यवसायाचे नुकसान भरून काढण्यासाठी 4 कोटी रुपयांच्या विमा रकमेचा दावा करू शकेल.
फतेहगढ साहिब बनावट विमा दावा प्रकरण
एसएसपी रवज्योत कौर ग्रेवाल यांनी बुधवारी (२८ जून) सांगितले की, रामदास नगर भागातील गुरप्रीत सिंग, त्याची पत्नी खुशदीप कौर आणि इतर चार जणांना सुखजीत सिंगच्या हत्येप्रकरणी अटक करण्यात आली आहे. पोलिसांनी दिलेल्या माहितीनुसार, सुखजीतची पत्नी जीवनदीप कौर यांनी बेपत्ता झाल्याची तक्रार नोंदवली तेव्हा हे प्रकरण उघडकीस आले.
गुरप्रीत सिंगचे त्याच्या व्यवसायात नुकसान झाल्याचे पोलीस तपासात समोर आले आहे. त्याची पूर्तता करण्यासाठी, त्याने त्याची पत्नी आणि इतर चार व्यक्ती - सुखविंदर सिंग संघा, जसपाल सिंग, दिनेश कुमार आणि राजेश कुमार यांच्यासोबत 4 कोटी रुपयांच्या विमा रकमेचा दावा करण्यासाठी स्वतःच्या मृत्यूचा बनाव केला.
बनावट मृत्यूच नाटक
गुरप्रीतने त्याच्या मृत्यूची खोटी कथा रचण्यासाठी त्याच्यासारख्याच सोनपूर परिसरात राहणाऱ्या सुखजीतशी मैत्री केली. मात्र १९ जून रोजी सुखजीत बेपत्ता झाल्यावर त्याच्या पत्नीने पोलिसात तक्रार दाखल केली. पोलिसांना सुखजीतची मोटारसायकल आणि चप्पल पटियाला रोडवरील एका कालव्याजवळ सापडली. तेव्हा त्याने आत्महत्या केली असावी असे वाटले.
मात्र सुखजीतच्या पत्नीने पोलिसांना सांगितले की, गुरप्रीत गेल्या काही दिवसांपासून तिच्या पतीला दारू विकत घेऊन देत होता. पोलिसांनी या दृष्टिकोनातूनही तपास केला. मात्र गुरप्रीतच्या कुटुंबीयांनी पोलिसांना सांगितले की, त्याचा रस्ता अपघातात मृत्यू झाला आहे.
पंजाबच्या बनावट विमा दाव्यांची कहाणी
पोलिसांना संशय आला. गुरप्रीतच्या कुटुंबीयांची पुन्हा कडक चौकशी केली असता सर्व काही खोटे असल्याचे उघड झाले. गुरप्रीत जिवंत होता. कुटुंबाने 20 जून रोजी राजपुरा पोलिस ठाण्यात गुरप्रीतचा रस्ता अपघातात मृत्यू झाल्याची तक्रार दाखल केली. तर, यापूर्वी १९ जून रोजी गुरप्रीतने सुखजीतच्या पेयात अंमली पदार्थ मिसळले होते, त्यामुळे तो बेशुद्ध झाला होता. त्यानंतर गुरप्रीतने त्याला स्वतःचे कपडे घातले आणि नंतर ओळख पटू नये म्हणून ट्रकखाली चिरडले. गुरप्रीतच्या पत्नीने सुखजीतचा विकृत मृतदेह तिच्या पतीचा असल्याचे ओळखले.
➤ वाढवा आपला व्यवसाय / वेब पोर्टल्स करिता इथे क्लिक करा.Call :- 9890 546 909.
