रेठरे धरण: भरधाव कारची समोरुन दुचाकीला धडक, दुचाकीवरील पिता- पुत्राचा जागीच मृत्यू
रेठरे धरण : रेठरे धरण (ता. वाळवा) येथे शिराळा रस्त्यावर भरधाव मोटारीने धडक दिल्याने झालेल्या अपघातात तडवळे (ता. शिराळा) येथील तुषार भानुदास शेवडे (वय २७) व भानुदास गुंडा शेवडे (५५) हे पिता-पुत्र जागीच ठार झाले. हा अपघात मंगळवार, दि. ०४ मार्च रोजी रात्री १० वाजता रेठरे धरण तलावाजवळील पोपट उगळे यांच्या घरासमोर घडला.
याबाबत अधिक माहिती अशी, तडवळे येथील तुषार शेवडे व भानुदास शेवडे हे पिता-पुत्र तुजारपूर (ता. वाळवा) येथे यात्रेनिमित्ताने नातेवाईकांकडे जेवायला गेले होते. यात्रा करून रात्री दोघेही दुचाकीवरून (क्र. एमएच १० व्ही ९५७६) गावाकडे परतत होते. रेठरे धरण येथील तलावाजवळच्या उतारावर शिराळ्याहून इस्लामपूरच्या दिशेने भरधाव वेगाने निघालेल्या मोटारीने (क्र. एमएच ५० यु ०६९३) त्यांना समोरून जोरदार धडक दिली. अपघातात दुचाकीवरील तुषार व भानुदास शेवडे हे बाप-लेक सुमारे २० ते ३० फूट अंतरावर रस्त्याच्या बाजूला असलेल्या शेतात उडून पडले. दोघांच्याही डोक्यास व हाता-पायास गंभीर मार लागल्याने त्यांचा जागीच मृत्यू झाला.
अपघातानंतर मोटारीत असलेल्या चालक व अन्य दोघा-तिघांनी घटनास्थळावरून पलायन केले. ते नशेत असल्याची माहिती प्रत्यक्षदर्शीनी दिली. अपघाताची माहिती मिळताच मृत तुषार व भानुदास शेवडे यांचे नातेवाईक घटनास्थळी धावले. घटनास्थळी रेठरे धरण व परिसरातील नागरिकांनी गर्दी केली होती.
➤ वाढवा आपला व्यवसाय / वेब पोर्टल्स करिता इथे क्लिक करा.Call :- 9890 546 909.
