हिंंदू एकता आंदोलनचे संस्थापक नारायणराव कदम यांचा आज 81 वा वाढदिवस.
सांगलीत चार दिवसाची शिवजयंती सुरू करण्याचं श्रेयही नारायणरावांचंच आहे. नारायणराव हिंदुत्ववादी कार्यकर्ते, पण त्यांच्या मनात हिंदुत्वाची व्याख्या अगदी ठाम होती. समाजकारणात राजकारण आणलं नाही आणि अर्थकारण तर नाहीच नाही. शेकडो लोकांना न्याय मिळवून दिला, पण आपल्या पोटच्या मुलांसाठी कधी वशिला लावला नाही की शब्द टाकला नाही. राजकारणात सहज मोठी पदं मिळाली असती, पण तत्वांना मुरड घातली नाही.
या नारायणरावांची दुसरी बाजू तितकीच हळवी, भावनाशिल आहे. वारकरी घराण्याची परंपरा जपणार्या नारायणरावांनी पंढरीची वारी कधी चुकवली नाही. रस्त्यावर उतरून आंदोलन करता करता रंगभूमीही गाजवली. अनेक नाटकात स्त्री भूमिका सादर केल्या. चाहत्यांची वाहवा मिळवली.
नारायणरावांचं हे चौफेर, झंझावाती आणि हळवं आयुष्य थोडक्यात का होईना पण समाजासमोर यावं. नव्या पिढीला नेमकं हिंदुत्व समजावं यासाठी त्यांची मुलगी राणी यांनी त्यांची बायोग्राफी प्रसिद्ध करायचा निर्णय घेतला. नंतर तो निर्धारच झाला. मुलगा बिपीननं सहकार्य केलं. माईंनीही खूप आठवणी सांगितल्या. विजय कडणे यांनी त्या काळातल्या बर्याच घटना पुन्हा ताज्या केल्या..आणि या सार्यांच्यामुळं मी त्यांची बायोग्राफी लिहू शकलो. लवकरच हे पुस्तक तुमच्या हाती असेल.
➤ वाढवा आपला व्यवसाय / वेब पोर्टल्स करिता इथे क्लिक करा.Call :- 9890 546 909.
