मुंबईचे माजी पोलिस आयुक्त संजय पांडे यांच्यावर ईडीकडून गुन्हा दाखल....
मुंबईचे माजी पोलिस आयुक्त संजय पांडे यांच्यावर आता 'सीबीआय'पाठोपाठ सक्तवसुली संचालनालयानेही (ईडी) गुन्हा दाखल केला आहे. राष्ट्रीय शेअर बाजार अर्थात 'एनएसई'तील घोटाळ्यासंबंधी 'सीबीआय'ने केलेल्या तपास व गुन्ह्याच्या आधारेच ही कारवाई 'ईडी'ने केल्याचे सूत्रांनी सांगितले.
'एनएसई'च्या माजी सीईओ चित्रा रामकृष्णन यांनी आनंद सुब्रमण्यम यांच्या संगनमताने शेअर बाजाराच्या यादीत प्रविष्ट असलेल्या अनेक कंपन्यांमध्ये आर्थिक गैरव्यवहार केला, असे 'सीबीआय'च्या तपासात समोर आले आहे. चित्रा रामकृष्णन यांनी 'एनएसई' सर्व्हरमध्ये फेरफार करून त्याआधारे हा घोटाळा केल्याचे तपासात समोर आले आहे. हा गैरव्यवहार सुरू असताना 'आय सेक' ही आयटी क्षेत्रातील कंपनी 'एनएसई'चे माहिती तंत्रज्ञानाच्या आधारे लेखापरीक्षण करीत होती. 'आय सेक'कडे 'एनएसई' सर्व्हर सांभाळण्याची जबाबदारी होती. ही कंपनी संजय पांडे यांची आहे. त्यामुळे त्यांचादेखील या घोटाळ्यात समावेश असल्याच्या संशयातून पांडे यांची मागील आठवड्यात 'ईडी'ने चौकशी केली होती.
त्याचवेळी 'सीबीआय'नेदेखील या घोटाळ्याचा गुन्ह्याच्या दृष्टीने तपास सुरू केला आहे. हा घोटाळा करण्यासाठी चित्रा रामकृष्णन यांनी संजय पांडे यांना हाताशी घेऊन 'एनएसई'तील अनेक उच्चाधिकारी व काही कंपन्यांच्या उच्चाधिकाऱ्यांचे फोन टॅप केले होते, असा 'सीबीआय'चा संशय आहे. २००९ ते २०१७ या कालावधीत हे फोन टॅप करण्यात आल्याचे 'सीबीआय'च्या तपासात समोर आले आहे. त्यावरूनच 'सीबीआय'ने पांडे यांच्यासह अन्य काही उच्चाधिकाऱ्यांसह गुन्हा दाखल केला आहे. गुन्हा दाखल केल्यावर 'सीबीआय'ने मुंबई, पुणे, कोटा, लखनऊ, दिल्ली भागांतील १८ ठिकाणांवर छापेदेखील टाकले होते.
'सीबीआय'ने केलेल्या या कारवाईच्या आधारेच 'ईडी'ने गुरुवारी पांडे यांच्यासह 'एनएसई'शी संबंधित माजी अधिकाऱ्यांविरुद्ध गुन्हा दाखल केला आहे. प्रामुख्याने फोन टॅपिंगप्रकरणी हा गुन्हा दाखल करण्यात आला आहे. फोन टॅपिंग हे फौजदारी प्रकरण असून, वास्तवात त्याचा तपास 'सीबीआय'च्या कक्षेत येतो. पण या फोन टॅपिंगसाठी साडे चार कोटी रुपयांची लाच दिली गेल्याचे 'सीबीआय'च्या तपासात समोर आले आहे. पैशांची देवाण-घेवाण हा 'ईडी'चा विषय असल्यानेच हा गुन्हा दाखल करण्यात आल्याचे सूत्रांनी सांगितले.
➤ वाढवा आपला व्यवसाय / वेब पोर्टल्स करिता इथे क्लिक करा.Call :- 9890 546 909.
